O Blog de Editorial Galaxia

Se me tivese que definir cunha palabra diría que son un incrédulo. Pero tamén son moi racional. De neno fun un traste, de adolescente un inconformista. Pertenzo a unha xeración que nos criamos na rúa. Na casa non había libros, nin sequera os de texto. Aínda agora non sei como fun quen de superar a educación xeral básica tendo en conta os escasos recursos dos que dispoñían meus pais. Descubrir a Biblioteca Municipal de Pontevedra, na adolescencia, foi para min unha beizón. Dende aquí quero reivindicar o papel fundamental das bibliotecas públicas no desenvolvemento cultural da sociedade. Hai uns días unha boa amiga que traballa nunha biblioteca pública preguntoume se non me parecía mal que pedise o meu libro para a biblioteca. E por que me ía parecer mal? Porque ao mellor prefires que o merquen, respondeu ela. Claro que quero que o merquen, contesteille eu, pero o que máis me satisfai é que o lean. Por suposto que estarei encantado de que teñades o libro na biblioteca para que o poidan ler todos os usuarios que o desexen.
En contra do que opinan algúns, penso que as bibliotecas non constitúen un atranco para o desenvolvemento das industrias culturais, senón todo o contrario. As bibliotecas públicas contribúen dun xeito eficaz á difusión da cultura, e cando a cultura se esparexe gañamos todos, tanto os cidadáns como as industrias que a fan posible. Como son moi racional nunca me pasou polo maxín a posibilidade de privatizar o aire que respiramos, como tampouco se me ocorrería nunca cobrar por consultar un libro nunha biblioteca. A quen se lle ocorreu esta disparatada idea, tamén se lle ocorreu agora manter os servizos públicos co voluntariado. Este tipo de actuacións pon de manifesto o valor que para esta xente ten, non só a cultura, senón todos os servizos públicos en xeral.