Noticias
19-11-2008
Aberta a exposición "Editar en galego baixo a censura franquista"
Desde onte está aberta ao público, na Casa Galega da Cultura e ata o 11 de xaneiro, a exposición sobre as dificultades para a edición en galego durante o franquismo. A exposición amosa documentos, algúns deles inéditos, pertencentes aos fondos da Fundación Penzol, da Editorial Galaxia e do comisario da mostra, Xosé Manuel Dasilva.
18-11-2008
No pasado mes de agosto, morreu en Madrid o escritor Fariña Jamardo
Chega a nós a noticia a través dun artigo de Vicente Araguas, compañeiro de tertulias no café Comercial, na capital de España (El Correo Gallego, 16 de novembro). O autor de "Tiroliro a sete voces" finou o pasado 19 de agosto.
18-11-2008
O espectáculo teatral FLIS-FLI-RIS-FLÁS en Vigo
O domingo 16 de novembro, no Auditorio do Centro Cultural Caixanova, totalmente de balde, todas as nenas e nenos que o desexen, así como as súas familias, poderán asistir aos desvelos e aventuras de Martiño, un cativo con medo á escuridade.
19-11-2008
Estudantes de bacharelato con Otero Pedrayo en Trasalba
Case setecentos rapaces e rapazas de bacharelato participan en Trasalba nunha serie de encontros literarios arredor da obra de Otero Pedrayo. A concellería de Educación de Ourense dota as bibliotecas de aula nos centros de ensino secundario con títulos do autor de "Arredor de si".
14-11-2008
Carlos G. Reigosa, Premio Torrente Ballester
O escritor Carlos G. Reigosa recibiu o XX Premio Torrente Ballester de Narrativa convocado pola Deputación da Coruña pola súa novela A vida do outro. Nesta obra reflexiona arredor da transición á democracia en España e sobre o seu significado para toda unha xeración desde os ollos dun protagonista que vive nun mundo que el coñece moi ben: o xornalismo.
12-11-2008
O audiovisual galego
Dentro do programa de actividades complementarias á exposición "Galicia 25. Unha cultura para un novo século", que ata finais de novembro está aberta nas salas de Caixanova en Vigo, un grupo de especialistas debateron sobre a realidade actual e o futuro do audiovisual galego.
11-11-2008
No pasamento de Camilo Gonsar
Onte soubemos da morte, tras dunha longa enfermidade, do escritor Camilo Gonsar, un dos nomes máis representativos da Nova Narrativa Galega. O autor, nado en Sarria hai 77 anos, viña de ver publicados o mes pasado o seus "Relatos completos. 1961-1995".
12-11-2008
O idioma cara o futuro
A revista Grial dedica o seu número 179 á lingua galega diante dos desafíos do futuro: lingua, sociedade e política. Un monográfico coordinado polo profesor Henrique Monteagudo, e no que colaboran especialistas da sociolingüística e a planificación: Anxo M. Lorenzo, Xaime Subiela, Bieito Silva, Burghard Baltrusch e Ángel López García-Molins.
11-11-2008
Unha entrevista con Rei Ballesteros
A semana pasada finaba o escritor Anxo Rei Ballesteros. Dolores Vilavedra e Carlos Lema mantiveron unha longa conversa con el para a revista Grial no seu número 159 e que titularon "Metáfora dunha comunidade ausente". Desde a ausencia provocada pola súa perda, revisitamos aquela conversa que agora pode descargarse en PDF.
11-11-2008
FLIS-FLI-RIS-FLÁS COMEZA A VIVIR NOS BLOGS
A campaña de animación á lectura desenvolvida pola Secretaría Xeral de Política Lingüística e a Editorial Galaxia comeza a ter vida propia nas distintas páxinas web e blogs de bibliotecas escolares do país. Alumnado e axentes sociais amosan as súas impresións diante deste proxecto que conxuga o teatro, a literatura, as novas tecnoloxías, e que aposta polo traballo en familia arredor da lingua.
|
 |
|
|
|
|
